السبت، 11 فبراير 2012

الشعب الصبور المهاود – بطل من ورق Vs تخاريف !


من كتر الاحداث الواحد مبقاش عارف يكتب ايه ولا عن ايه احداث مؤلمة احداث محزنة احداث مخزية و احداث دموية..

لذلك اللي حكتبه انهاردة هي بس وجهة نظر او عرض للموقف الاسم مش حيفرق المهم الدوامة اللي بقينا عايشين فيها
او انا شخصيا عن نفسي . 

الله يخرب بيتكم خربتوا البلد , انتوا شوية عيال و حتخربوا البلد , متدوا المجلس فرصة يشوف شغله و مسلمش السلطة في معادها ابقوا انزلوا الميدان تاني هو حيطير . جمل من دي بسمعها تقريبا كل يوم 100 مرة لما كنت علي وشك اني اتخرص تماما و ابطل اتكلم في السياسة حتي قدام مراية الحمام !!! طيب لو قلنا فرصة للمجلس العسكري طيب ما احنا ادينا فرصة سنىة حصل ايه !! اكثر من اربع مجازر تشيبب لها الراءس انهيار اقتصادي و مجلس شعب اداءه عبارة عن خناقات و بعد كده يصالحوا بعض بهلز نعناع !! و محدش يقول بقي ان السبب في انهيار الاقتصاد هي المظاهرات و الدليل مش سر ولا حاجة  ببساطة بعد 25 يناير 2012 كان اعلي معدلات للبورصة المصرية من 2006 ده معناه ايه طيب الشعب السبب مثلا !!! و بعدين بدل ما كل حاجة ندي المجلس فرصة و توفيق عكاشة فرصة و احمد سبايدر و الشخصيات الكرتونية اللي احنا عايشين و سطيهم دول طيب مندي الثورة و الشباب فرصة مثلا .

و علي غرار احداث الداخلية عقب مجزرة بورسعيد مكنش عاجب الناس الناس ان فيه ثوار هناك و في اشتباكات ده علي اعتبار انهم ثوار زي م انا شايفهم مش بلطجية و لمؤاخذة . ليه مش بنفكر للحظة ان ده غضب كامن و التعبير عنه كان لازم يكون قدام رمز الي شارك بشكل او باخر في قتل الابرياء و خصوصا ان لجان تقصي الحقائق يديك و يدنا طولت العمر ده حتي لجنة تقصي الحقائق من ايام حريق القاهرة مظهرتش نتايجه لحد دلوقتي . طيب يبقي بلاش الداخلية و بلاش اشباكات يا ولاد يالا بينا اضراب عام بقي نضغط بيه و سلمي اهو بقينا حنخرب البلد و حنوقع الاقتصاد العالمي بتعنا !!! ده حتي المؤسسات الدينية بمختلف الطوائف حرمت العصيان المدني .. لا ياااا رااااجل احدا احد ....

يعني لا السلمي نافع و لا العنف و لا الاضراب نافع و لا المجلس نافع اذا كان النواب نفسهم اعتصموا فيه !!!
و بالمناسبة بقي المشهد الجديد في مسرحية تخاريف اللي عايشين فيها اه نسيت اخراج المحلس العسكري طبعا .فجاءة المجلس طلع بقضية التمويل الاجنبي علي اساس مثلا ان احنا دولة مش عايشة علي الدعم اصلا من قديم الازل لا و الكوميدي كمان ان الجامعة الامريكة بقت عميلة عشان اسمها كده بس تبقي عميلة يا سلام و الدكتور البرادعي عميل و نوارة نجم هي كمان بقت عميلة و بتاخد تمويل اجنبي و اتعمل اختراق للبريد الالكتروني بتاعها في طلع انها عميلة و ممولة من ايران و جهات تانية حنعرفها بعدين ... يا حلاوة ده ناقص ماما اللي بطتبخ دي في المطبخ تبقي عميلة . 

و كمان ابو حامد بقي ابن حارس عقار اصلا " طيب و ايه المشكلة حتي لو ده حقيقي الراجل نائب محترم و اداءه يشاد بيه , مصطفي النجار بقي كيوت اوي عشان راح المجلس لابس سويت شرت احمر ف ابيض  مش بدلة .. نسيب بقي البلد مهي مسرحية تخاريف الحقني الحقني يا ابن الجني .. اصل المجلس نازلنا بقي باعلانات جديدة في شوارع مصر الجيش و الشعب ايد واحدة و حاطط صور علي المدراعات لعسكري و شايل طفل ناقص بس يا ناس يا شر كفاية ارررر و يوم مسيرات الوزارة المجلس طلع فرق موسيقي عسكرية علي اساس اننا بيتعامل مع كائنات فضائية مثلا .. و البيانات كلها طبعا ملهاش علاقة بالواقع اصلا ناقص بس تبداء ايه يا شعبي الصبور المهاود قرار ديكتاوري يلغي القرار اللي بعده وبعدين يقلنا تكلم يا ابن الشعببببببببببببب ها واخدلي بالك ياض انت و هو تكلم يا ابن الشعببببببببب .. ده حتي المؤسسات الدينية بتكلم ناس في نفس الكوكب اللي المجلس بيكلم فيهم و قالوا ان العصيان المدني حرام " يا واد يا مؤمن " 

اللي عايز اقوله هو مجرد عرض بس للي بيحصل و الفيلم اللي عايشين فيه و اللي بصراحة حاسس ان اللي كاتبه رامي خشوع مثلا و المجلس هو البطل من ورق ..
عشان كده القناعة كنز لا يفني .. كان مالها عيش حرية عدالة اجتماعية لازم توسع مننا و نقول اسقاط النظام
طيب ادينا بقي حنخرب البلد و نضيعها و المواطنين الشرفاء اللي المجلس بيناشدهم دايما هما و الطرف الثالث اللي من عصابة الولاولا الحمراء حيهيصوا في البلد لوحدهم ...
طولت عليكم معلش اصلي كنت مبقوق شويتين تلاتة بعد اذنكم بقي اروح اخرب في البلد شوية ما انا فاضي و بلطجي بقي .. سلالالام مع تحيات رامي خشوع ... و الجني ...

عمار ياسر

ليست هناك تعليقات:

إرسال تعليق