نقلا عن ... Yasmine Madkour
كلمتين محشورين ف زوري:
الناس اللي بتقول انه عملنا حاجه أخيرا و خلاص كفايه كده يا شباب و خلاص بقي
أولا: ده كان يبقي قبل ما أي واحد يموت .. سيبك من المصابين .. لكن ده بينا و بينه شهداء .. ده لو كنا أساسا سامحناه ف شهداء العباره اللي كان بيتريق عليها و لا شهداء القطارات و لا شهداء الدول العربيه اللي بيتبهدلوا و محدش بياخد حقهم
ثانيا: الجيل اللي عمال يسكتنا .. ده جيل أهالينا اللي خايفين علينا أوي .. و اللي طول عمرهم العلاوه ياخدوها من هنا الاسعار تغلي من هنا و يسكتوا .. برضه من هنا
و طول عمرهم مشغلين لنا تريلر فيلم الكرنك
ثالثاً اللي من جيلنا بقي و عمالين يقولوا كفايه كده عملتوا اللي انتوا عاوزينه .. طالما بتتعاملوا باسلوب الخطاب .. يعني انتوا مش معانا .. يبقي انتوا متعرفوش مطالبنا
مطالبنا كان
واحد و أهمها اقالة الرئيس و نظامه و تنحيه نهائيًا عن الحكم
اتنين: حل البرلمان
تلاته: الغااااااااء قانون الطواريء .. اللي مجابش سيرته و اللي لو متوقفش كلنا هنترمي ف المعتقلات زي السادات ما عمل .. و اهم عمالين يروجوا ان الاخوان اللي عاملين الثوره دي عشان يبقي الموضوع شرعي و جماعه محظوره بقي و كده
أربعه: تعديل المواد 76 و 77 و 88 و 139 و مواد أخري في الدستور لحين وضع دستور جديد علي يد جمعية ائتلافيه يقوم عليها مجموعة من الشرفاء و خبراء الدستور
خمسه: إطلاق سراح المعتقلين سياسيا ممن ليس عليهم أي احكام جنائيه (بين قوسين دول اللي راحوا سلموا نفسهم بعد ما السجون اتفتحت)
سته: محاكمة كل رموز الفساد و المستفيدين منه
سبعه : تعديل فوري للمواد 66 و 67 و 5 و 88 و 179 لضمان انتخابات رئاسيه نزيهه و حره يراقب عليها القضاء (و ده اللي هو مجابش سيرته.. مجابش غير سيرة المادتين اللي هو أساسا كان عدلهم عشان ابنه يبقي يمسك الحكم)
تمانيه: إلغاء كل القرارات التي حكمتها الحكومه من فروض الجبايه علي المواطنين .. كالضرائب علي المرور و السيارات و الضرائب العقاريه .. ده المرتبات بيتاخد منها للضرايب مش فاهمه فيه ايه تاني فاضل ياخدوا عليه ضرايب .. و ياريتنا بنتعالج و لا بنتعلم و لا بنسكن و لا بنتجوز .. مسحولين و متشحططين ورا لقمة العيش و مننا اللي بيتغرب عشان يعيش .. يرضي مين ده يعني؟
عشره: تنفيذ كل أحكام القضاء الصادره و احترام أحكام القضاء كسلطة مستقلة .. بما فيه إلغاء الحرس الجامعي و نتائج الانتخابات الأخيره)
إحدي عشر: إلغاء كل الاتفاقيات التي تمس أمن و سلامة المجتمع و تضيره في اقتصاده .. بين قوسين و أربع أقواس و عشرين خط أحمر تحتها .. اتفاقية الغااااااااااااااااااز مع اسرائيييييل .. اللي يشوف الناس واقفه ف طوابير عشان أنبوبة غاز و بتغلي عليهم كمان كل فتره ميسكتش علي اللي بيحصل .. داحنا بنصدرلهم أكتر من 40 ف الميه من احتياجهم .. و إحنا شعبنا محتاج .. الغاز اللي ضربوا بيه الاطفال ف غزه .. ده الغاز بتاعنا علي فكره
اتناشر: توفير حد أدني للأجور 1200 جنيه لتوفير حياه كريمه للمواطنين
تلاتاشر: محاربة الغلاء و عدم ربط رفع الأجور بغلاء المعيشه
----
أكمل بقي كلامي..
للعلم .. انا ابويا كان بيحب الريس علي المستوي الشخصي و كان بيعتبره بطل حرب .. و أنا و أبويا دايما علي خلاف دائم علي النقطه دي .. بعد ما شاف اللي حصل .. قاللي الراجل ده مش قاعد فيها و لولا إني كبير ف السن و معرفش هروح التحرير ازاي دلوقتي كنت نزلت
أمي قالتلي ياريتنا جنبهم كنت نزلت مرضت المصابين و عملتلهم أكل
خليني بقي اقولكوا علي حكايه يمكن محدش فيكوا هيصدقها ..
بنت أعرفها كانت رايحه يوم الجمعه و عشان هي بنت ف وسط كل المتظاهرين الرجاله فممكن أي حد يشوفها و هي بتصور و عاوزه تاخد الداتا دي عشان توصلها للناس و تكلمنا علي الارضي عشان نوصل صوتنا للإعلام
راحت عشان تقص شعرها ويبقي شكلها ولد .. لدرجة إن محمد دياب لما عرف قاللي ليه .. و قلق عشان الأمن مبيضربش البنات بنفس الوحشيه
الناس انهارده بقت بتتكلم ف السياسه و كله بيقول مكناش نحلم بكده و كفايه علينا كده .. بلاش موت و دم أكتر
أحب أقول للناس دي
اللي احنا فيه بسبب ده .. إنكوا كنتوا بتتكيفوا .. كنتوا بترضوا بأي حاجه .. إحنا نازلين و مطالبنا واضحه
العالم كله سمعها
إقالة الرئيس و من معه
مشكلتنا مش ف عمر سليمان
و لا البرادعي و لا اي أراجوز حتي
و اللي فاكرنا مش عاملين حسابنا عشان الفراغ السياسي
إحنا قايلين في تاني طلب من طلباتنا .. إقالة الحكومة و تشكيل حكومة إنقاذ وطني لمدة ست شهور لحين إجراء إنتخابات رئاسية جديده
أنا للحظة بعد خطابه قولت خليه سبع شهور و احنا كده أثبتنا اننا نقدر و كل الكلام اللي بسمعه دلوقتي
بس افتكرت الأمن و هو بيضربنا بوحشيه
افتكرت اصحابي اللي اعتقلوا و لما خرجوا قالوا هننزل كل يوم
افتكرت الناس اللي صليت عليهم و أنا ف بيتي
افتكرت الشهدا اللي شوفتهم علي الجزيره عربيات الأمن المركزي بتدوس عليهم
مكناش شباب بس .. إحنا كنا أسر و عائلات ف الميدان
أنا منزلتش كل الايام .. أهلي كانوا قافلين الباب عليا
بس لما عدت مظاهرة من جنبنا قالوا ننزل .. بس طلعت مؤيدة للرئيس
إحنا بينا و بينه دم و مصابين مش عارفين نجيب لهم دم منين
و مفقودين
الهيومان رايتس ووتش بتعتبره مجرم ضد الإنسانيه و بتطالب بمحاكمته دوليا
الناس اتضرب عليها قنابل مولوتوف و هما أصلا اللي كان بيدخل الميدان عليهم كانوا بيفتشوه و لو معاه قلم رصاص كان بيتاخد عشان محدش يستخدمه ف عنف
الناس دي عزّل .. عارفين يعني ايه؟ يعني زي اللي قامت عليهم حرب
فاكرين غزوة الأحزاب؟
طب بلاش .. الطاغيه ده خرجنا من بيوتنا عشان نحمي نفسنا
بيساومنا يا إما الأمان و الاستقرار .. يا إما الحريه و الكرامه و المطالب
ده إحنا صفحه أولي ف كل جرايد العالم و الجمهوريه لسه بتقول مخربين
المخربين دول بلطجية النظام .. أمن الدوله اتحرق عشان الورق اللي فيه بيكشف مصايب
المحلات ف التحرير مفيش محل اتكسّر .. إشمعني؟؟ و لا هو كارفور و أركيديا بس؟
الفندق اللي ولع ف وسط البلد ده .. مين قال الفنادق مفيهاش اطفاء ذاتي؟ ولا طفايات حريق؟؟
المباني اللي ولعت و قالوا المتظاهرين ولعوها .. فين المطافي؟ تحمي الوطن؟ .. و لا هي المطافي مش موجوده غير عشان تفريق المتظاهرين؟؟
فيه لحد دلوقتي 500 واحد مفقود .. يعني ممكن اوي يبقوا ماتوا
فاكرين اللي غرقوا ف العبارة؟ و اتريق علينا و قال عباره من اللي بيغرقوا؟
لما حفيده مات حزنا عليه .. و إحنا ولادنا و أهالينا ماتوا مجابش سيرتهم ف خطابه كل اللي افتكره انه محارب و ابن البلد و عاوز يعيش و يموت فيها
هو مش برضه ده الريس اللي قال عنه عماد أديب انه كان نفسه يكمل حياته سفير ف لندن ؟؟ و بعدين بقي ف اللخبطه دي ؟؟ ما يقولنا عاوز يكمل حياته ازاي
مش محتاجه احكي عن اللي بيموتوا من الجوع و البرد ف الصعيد
مش محتاجه اتكلم علي أولاد الشوارع
و لا محتاجه أتكلم عن العشاوئيات اللي اتغطت ف زيارة أوباما عشان يفضل ياخد المعونه
لما الذخيره بتاعته خلصت علي المتظاهرين مهو مكانش عامل حسابه .. طلب من أمريكا ذخيره .. رفضوا .. ف التو و اللحظه وصلت طيارتين من اسرائيل بذخيرة قنص ضد المتظاهرين
بيحاول يضغط علينا و يخوفنا و يحببنا فيه
و يطمس الحقايق
تفتكروا لو واحد من اللي ماتوا دول شايفنا و احنا بنقول يقعد .. تقتكر هيقول ايه؟
هيقول انا مموتش عشان كده
محدش يقولي يمشي بعد ما يخلص مدته عشان ده محارب .. أحمد الهوان اللي كانت حياته موهوبه عشان جهاز اتصال للمخابرات .. مش لاقي يتعالج
و سيدات الحزب الوطني بيروحوا يعملوا عمليات تجميل علي حساب الدوله
عائلات شهداء أكتوبر و المحاربين .. محدش فيهم عارف يعيش
واحد كان محتاج عمليه ف عينه و الا هيتعمي استنجد بنشاط طلابي ف مدرسة أختي .. عشان مكانش معاه غير 4000 جنيه هيجهز بيهم أخته .. و محتاج أصلا عليهم ألف عشان العمليه و حفي علي المستشفيات الحكوميه عشان يتعالج .. الراجل ده دلوقتي بيعيط و الدكتور بيقوله متعيطش عشان العمليه .. لموا عشانه فلوس من المدرسه كلها
محمود سعد مكانش بيشكر أي مسؤل لما يعمل حاجه .. عشان ده واجبه .. لو معلموش المفروض يتحاكم أصلا
أحمد زويل و مجدي يعقوب .. و كل علماءنا ف الخارج .. عمرهم ما كانوا هيبقوا علماء إلا لو كانوا ف الخارج .. تفتكروا لمصلحة مين؟
كان فيه عالم هندسة وراثيه بقاله 35 سنه بيصارع النظام عشان بس .. يزرع الفصيلة المهجنه اللي عملها من القمح .. بتاخد نص كمية الميه و بتطلع ضعف المحصول
إسرائيل قالتها صراحة إنها عاوزه نظام مبارك يستمر
و امريكا قالتها صراحة إنها هتحترم قرارات الشعب و يجب علي مبارك العمل علي انتقال السلطه الآن .. يعني الكوره ف ملعبنا
و اللي بيقولوا البلد بتولع و الاقتصاد بيقع .. مش اقتصادنا .. ده اقتصادهم .. الاقتصاد اللي بيقع ده خلي واحد زي أحمد بهجت يظهر فجأه ف الصوره و يقول كفايه
وواحد زي نجيب ساويرس يقول علي الأولي ف التليفزيون المصري كفايه كده و دول مخربين و يتريق علي الناس اللي رافضه عمر سليمان و يقول هو مين اللي عمل استفتاء قال ان الناس رافضاه .. علي أساس ان فيه أساسا استفتاء اتعمل نزيه و حر علي مبارك
و ييجي علي اقناه بتاعته يقول انا بحيي الشباب الجميل اللي رجعوا لنا الحريه
لعيبة الكوره عملوا وقفه .. علي أساس انهم لسه واخدين بالهم ان فيه مظاهرات .. ما طبعا عشان الي كان بيجيب فيهم جون كان وزير البترول بيديله من تمن الغاز .. أومال ايه ما هما اللي منيمنا و سايبنه يبيع ف الغاز بتاعنا
الاقتصاد بتاعنا اللي بيقع ده .. ده إذا كان فيه اقتصاد أصلا أو إذا كان فيه اقتصاد يعود علي المواطنين .. محدش هيقومه غيرنا
إحنا اللي وقفنا نحمي بيوتنا بدل ما نخاف و نكش
إحنا اللي وقفنا ف التحرير بالملايين
إحنا اللي وقفنا ننظم المرور بدل الشرطه اللي اختفت و ظهرت ف زي مدنيين بلطجيه
إحنا اللي واقفين دلوقتي ف طوابير العيش بنتكلم ف السياسه و محدش بياخد دور حد ف الطابور وواقفين باحترام
إحنا اللي كتير مننا لما لقي الأسعار بتغلي راح بنفسه جاب بطاطس و كوسه و خيار و خضار و فاكهه و باعها قدام السوق باتنين و تلاته جنيه عشان يجبر السوق كله يبيع و ميستغلش الناس
إحنا اللي مفيش واحد فينا رفع إزازة ميه فاضيه علي الامن المركزي
و لما كانوا بيجوعوا و يعطشوا كنا بنديهم من اللي معانا
إحنا اللي ف الاعتصام نضفنا مكاننا و كنسنا الشوارع
إحنا اللي كان قاعد ف البيت كان بينزل أكل و ميه للمتظاهرين من البلكونات
إحنا اللي كنا بندعي و نصلي قضاء حاجه
إحنا اللي كنا بنتفرج علي الجزيره اللي كل شوية يقطعوا ارسالها عشان الوحيده اللي بتقول الحقيقه عاريه من أي لعب أو صمت
إحنا اللي حاوطنا علي عربيات الأمن عشان محدش يكسرها
إحنا اللي وقفنا نصلي و الميه بتزقنا و بتضربنا زي الكرباج و عربيات الأمن مندفعه علينا و اللي كان بيحمينا كان بالحرف بيتداس
إحنا الجيل اللي مصر كانت مستنياه
و بندفع و مستعدين ندفع تمن الحريه مهما كان
إحنا الجيل اللي اتعود يكتب بحريه علي الفيسبوك .. و لما اتجمعنا من غير ما حد يجمعنا قولناها بقوة علي ارض الشارع
إحنا اللي اتعودنا نعلن العصيان علي أي حاجه مش عاجبانا
اتعودنا نعبر لو حتي بستيتس علي الفيسبوك و لا تويتر
لولا اننا بالقوه دي مكانوش قفلوا النت و الموبايل
لولا اننا بالقوة دي مكانوش طلعوا البلطجيه من السجون
لولا اننا بالقوه دي مكانوش كل شويه يدوروا علي حاجه يضغطوا بيها علينا
أنا مجبره اقعد ق البيت .. بس أهلي مقتنعين تماما إن لو فيه مظاهره قريبه مننا هننزل
أهلي دول اللي ضربوني و بهدلوني لما عرفوا اني كنت ف مظاهره و اتبهدلت عشان قولت لابويا ننزل .. دلوقتي بيقولي هننزل لو فيه مظاهره قريبه مننا .. بس عشان هو ميقدرش يمشي مسافات طويله
إحنا اللي ثورنا .. ثورتنا كانت ثورة نور .. المعاد متحدد .. المكان متحدد .. و يمكن كمان العدد و الناس كانوا متحددين
و الراجل ينزلنا
قوتنا في اللا عنف
ربنا معانا ..أنا واثقه ف ربنا
النظام كل ما يعمل حاجه فاكر انه بيكسب يخسر
كل اللي تعاطفوا معاه في خطابه .. انهارده بيرفضوه بعد البلطجيه اللي نزلهم علي الناس .. و الناس كانت عامله حواجز بشريه عشان سلميه سلميه
معناش أسلحه .. عزل من السلاح
و لكننا لسنا عزل من الإراده و الأمل و الحياه و الحريه و الإراده و الإيمان
إرحل
الشعب يريد اسقاط النظام
-------
ملحوظه:
نسيت بس أنبه
جمال مستقالش من الحزب
و مبارك مجابش سيرة التوريث
و الناس اللي كانوا شغالين ف مكتبه باعوه و بيحكوا انه كان بيفوض لجمال كل حاجه بعد ما رجع من بره عشان يهيأ لإنه يبقي الرئيس اللي جاي
و الناس اللي بتموت دي حقها إننا ننزل نحميها
ليست هناك تعليقات:
إرسال تعليق